“Sanglit
gibanhaw na man kamo uban ni Kristo, tinguha-a ang mga
butang nga atua sa langit diin naglingkod si Kristo
sa iyang trono sa tuo sa Dios” (Col 3:1) .
“Sanglit
gibanhaw na man kamo uban ni Kristo, tinguha-a ang mga
butang nga atua sa langit diin naglingkod si Kristo
sa iyang trono sa tuo sa Dios.” (Col 3:1)
Kining mga pulong ni San Pablo sa mga taga-Colosas,
naghisgot bahin sa kalibutan diin naghari ang matuod
nga gugma, inubanan sa hingpit nga panag-ambit, hustisya,
kalinaw, kabalaan ug kalipay. Didto, dili na makasulod
ang sala ug korapsyon. Kalibutan kini diin hingpit nga
matuman ang kabubut-on sa Amahan. Ug niining kalibutana
nahisakop si Jesus. Ang Iyang pagkabanhaw pinaagi sa
Iyang di mahunahuna nga pag-antos ug kasakit maoy nakapa-abli
niini para kanato.
“Sanglit
gibanhaw na man kamo uban ni Kristo, tinguha-a ang mga
butang nga atua sa langit diin naglingkod si Kristo
sa iyang trono sa tuo sa Dios.”
Matud pa ni San Pablo, wala lamang kita gitawag ni Kristo
sa nahisgutan nga bag-ong kalibutan, kondili nasakup
na gayud kita niini. Ang atong pagtoo nagtudlo kanato
nga pinaagi sa bunyag, nahisal-ot kita Kaniya, ug ang
sangputanan mao nga nakaambit na kita sa Iyang kinabuhi,
sa Iyang mga gasa, sa Iyang mga panulundon, sa Iyang
kadaugan sa sala ug batok sa mga daotan. Sa tinuod,
mabanhaw usab kita uban Kaniya.
Hinoon, samtang ania pa kita ning kalibutana, wala pa
mahingpit ang atong pagkasakop sa kalibutan ni Kristo.
Labaw sa tanan, kini dili pa lig-on o malungtaron. Samtang
buhi pa kita, gilibotan ta sa di-maihap nga katalagman,
kalisod ug pagtintal nga makapahimo nato sa pagdumili,
sa paglangan sa atong panaw o makapasimang nato ngadto
sa mga maluibong padulngan.
“Sanglit
gibanhaw na man kamo uban ni Kristo, tinguhaa ang mga
butang nga atua sa langit diin naglingkod si Kristo
sa iyang trono sa tuo sa Dios.”
Atong masabtan ang pahimangno sa Apostol: “Tinguha-a
ang mga butang nga atua sa langit.” Isip tawo,
dili malikayan nato ang mga butang nga materyal, apan,
sa atong espiritu, mabiya-an ra nato kini; mobiya kita
sa mga mando ug kahinam sa kalibotan aron ang mga hunahuna
ni Jesus maoy mogiya kanato sa matag sitwasyon.
“Ang
mga butang nga atua sa langit” nagpakita kanato
sa mga balaod sa gingharian sa kahitas-an, ang balaod
sa Gingharian sa langit nga gidala ni Jesus sa kalibutan
nga angay natong tumanon karon dayon.
“Sanglit
gibanhaw na man kamo uban ni Kristo, tinguhaa ang mga
butang nga atua sa langit diin naglingkod si Kristo
sa iyang trono sa tuo sa Dios.”
Unsaon man nato pagpuyo niining Pulong sa Kinabuhi?
Nag-awhag kini kanato nga dili makontento sa kinabuhing
binuhat sa alang-alang ug pauyon-uyon. Nagdasig kini
kanato sa pagpahiuyon sa atong kinabuhi subay sa grasya
sa Dios ug sa mga balaod ni Kristo.
Kining Pulong sa Kinabuhi nagdasig kanato sa pagpuyo
aron paghatag ug pagsaksi diha sa katilingban sa mga
hiyas nga gidala ni Jesus sa kalibutan - pananglitan
ang espiritu sa kadait ug kalinaw, sa pag-alagad sa
isigkatawo, sa pagsinabtanay ug pagpasaylo, sa pagkamatinud-anon,
sa hustisya, sa katarong sa trabaho, sa kamatinuuron,
sa kaputli, sa pagtahod sa kinabuhi, ug uban pa.
Daghan kaayong posibilidad apan kinahanglan buhaton
dayon aron dili kini magpabilin sa pangandoy lamang.
Niining bulana, sulayan nato pagpuyo sa balaod ni Jesus
nga naglangkub sa tanang lagda: ang pag-ila kang Kristo
diha sa matag tao ug ibutang ang atong kaugalingon sa
pag-alagad kanila. Sa ingon maka-andam gayud kita sa
katapusang pasulay sa atong kinabuhi.
|